شعر/ حسن بن قاسم قحل
عزي لمن مثلي غدا الوقت كاويه
ترك على خده وزنده وسومي
أحبس بجوفي الظيم غصبا واداريه
واناطح الأيام مثل الرجومي
وأكتم بصدري الآه خوف المشاريه
وشماتة العذال وبعض الرخومي
إلي يدور زلتي يوم اماشيه
وأنا أجاملهم بزين العلومي
الله يكفينا الزمان وبلاويه
والله يجنبنا ردي السلومي
ياما تحملت العنا دون ما ابديه
واهز راسي غصب ما غير أومي
كل ما بدالي جرح ارقعه واخفيه
مثل الذي يرقع شقوق الهدومي
يفرض علي واقع ولا اقدر اجاريه
واسكت قهر رغم إن ماله لزومي
هذا الزمن ماعد عرفنا خوافيه
ودنيا تقلب سعدها ما يدومي
وين الهنا والسعد ياوين الآقيه
من حر مابي عفت زادي ونومي
حاس الكدر والطين نبعي وصافيه
وتبدلت حالي وقلت عزومي
عزي لمن مثلي غدا الوقت حاديه
وحده زمانه واثقله بالهمومي
وباح الزمن سده وبين خوافيه
ووراه في عز النهار النجومي
شعر
حسن بن قاسم قحل
الملتقى العربي للأدباء 
يجب عليك تسجيل الدخول لكتابة تعليق.